طبعا اول ما هتقروا الموضوع هتفتكروا انى هاكتب على فيلم رعب ولا حاجة
بس للاسف ده مش فيلم ولا رعب
دى حقيقة بيعيشها اكتر من الف مصري بيعدوا من محطة شبرا الخيمة يوميا
القصة بتتلخص فى ان شبرا وزى ما انتوا عارفين بيتجمع فيها المسافرين من محافظات مصرالمختلفة وفيها محطة للسكة الحديد وفيها محطة مترو انفاق وكمان فيها نفق
النفق ده هو اساس المشكلة .. تخيلوا نفق تحت الارض .. ضلمة
ولان الناس مضطرة تعدى من النفق ده لانه اقرب واسهل طريق للمترو اللى اغلبهم بيركبه عشان يروح شغله
وطبعا انتوا متخيلين نفق ضلمة ممكن تحصل فيه ايه من تحرشات وحوادث سرقة ومواقف محرجة وسخيفة
العجيب فى الموضوع ان الناس ما اعترضتش ولا اشتكت بتمشي وهيا صابرة وراضية وكمان بتقول الحمد لله
للدرجة دى احنا اتعودنا على الظلم والمعاملة غير الانسانية التى بتجيدها حكومتنا الرشيدة
وتفتكروا اننا ممكن نعمل حاجة فى ظل السمة الجديدة للمصريين وهى الاقتناع بأن الظلم واجب عليهم
ولا ممكن الواحد يتفاءل بعد ما يشوف ناس زى اهالى البرلس وبدو سينا وغيرهم واللى انا بعتبرهم حالة طارئة على المجتمع المصري هتاخد وقتها وتعدى
